Meja nomor 16, di jero kafe. Ruslan halon ngalengak bir nu dipesen ti
saurang pelayan 10 menit samemehna. Geus dua gelas cai inuman eta ngaliwatan
tikorona. Tapi manehna katangen guligah,
masalahna nu keur didago teh teu wae we hol.
Najan kitu teuteupna buringas, mencrong lawang panto.
Diluar wangunan, Ros markirkeun mobilna
sisi jalan. Terus ngagidig bangun nu rusuh. Katangen make setelan blus warna bodas
nyipet tuur, mungkus kulitna nu kawilang mulus, satekerkebek nutupkeun pato
kafe. Langsung nyampeurkeun Ruslan.
“Dasar,” pokna rada centil hareupeun lalaki
nu ngarasa rungsing ti tadi. Ruslan ngarenghap, batinna rasa puas, sab awewe nu
ditungu teh kiwari geus nampeu hareupeun.
“Kumaha atuh nya , pan kuring mah geus boga salaki. Jadi teu
mustahil bisa ngamuk atawa kolu ngabunuh
mun inyana apaleun kalakuan urang kieu,” cek Ros minangka ngaleupaskeun bangbaluh hatena. Terus
nyeungeut roko nu dikaluarkeun tina kantongna.
Ruslan teu lemek najan sakemek, anggur
ngasongkeun sagelas bir ka Ros. Langsung ditengak.
Di luar langit kulawu maju malih warni.
Pasosore maju lekasan tur rek baganti kana peuting. Tapi, ibarat hiji bahasan
atawa gempungan nu ngajaha dianco baris aya kasimpulan, hasilna lapur alias
ngabuntut bangkong. Nangen kitu, saurang palayan tangginas ngasongkeun sabotol
bir deui, nepika maranehna kelebuh dina asuhan nu ngarana cinta.
**
“Naha urang teh keur salingkuh?” omong Ros
bangun ngalindur. Ruslan
neuteup. Ros nyaritana alon teu walakaya. Terus seuri. Ruslann dengdek bari meletetkeun panonna.
Hayang negaskeun ucapan awewe hareupeunana. Terus manehna ge milu seuri.
“Dua insan nu saling pikadeudeuh, naha bisa
disebut salingkuh? Asana eta teh pikiran nu kaliru, euy.”
“Ari geus kumaha salaki kuring?”
Ruslan ngahuleng.
“Oh, eta mah geus katalikung dina
kaulinan urang salila ieu.”
Maranehnya nyakakak. Teu ieuh nolih panangeun anu araya di
sabudeureun ruangan kafe.
**
Isuk-isuk Ruslan ukur diuk ngaheneng di
rohang tempat dahar imahna. Dahareun nu ngabarak dina meja teu ieuh matak
kabita najan beuteungna masih kosong. Rohangan imah karasa tegang perbawa
hatena asa keur perang. Indungna ti tatadi katangen guligah. Ruslan ukur bisa nginum
ciherang saregot.
“Ema mah teu maksa ujang kudu rusuh
nikah, najan nurutkeun umur mah pantes mun geus lakirabi teh. Tapi lin berarti milih
awewe nu geus boga salaki,” omong indungna semu haroshos. Terus menerkeun
tiungna nu rek ngolosod. Ruslan mugem,
sab inyana geus leuwih ti cukup ngadenge ucapan indungna jauh ti sapada inyana
tepung jeung awewe nu geus jadi puputon atina.
Ari geus kudu ka awewe nu mana deui, Ruslan batinna ngajerit.
Antara anak jeung indung silih teuteup.
Teuteup nu papada hurung ngemu amarah.
“Paling henteu jeung Siti budakna dokter
gigi tea. Manehna budak bageur, someah, handap asor ka sasama, bari jeung masih
parawan.” omong indungna tandes.
“Ah ari Ema, pan apal indung bapana ge
teu panuju kana hubungan abi jeung Siti. Keur naon dipermasalahkeun deui,
nyiar-nyiar pimadarateun jeung bancang pakewuh,” cek Markon mela diri. Inyana
teu sudi kasedek.
**
Geus
saminggu ieu Ruslan guligah. Omongan indungna ibarat malakal maot nu salila ieu
teu weleh ngukuntit. Tuda geus kapalang
masket ka Ros, awewe nu geus wanoh ti jaman kuliah.
Ruslan meubeutkeun satengah awakna di
meja bar. Leungeun katuhuna teu lesot tina gelas bir nu eusina ampir beak. Paneuteupna teu lepas tina gelas bir eta,
teuing naon nu pencrongna. Markon geus nyidem kasusah nu rohaka kawas puluhan
botol bir nu hayang diancurkeunana.
“Naha masih keneh mikiran ucapan indung?”
tanya Ros, anu kakara datang bari terus diuk di gigireunana. Katangeun nyantey,
teu rurusahan kawas samemehna.
“Kuring hayang boga turunan ti anjeun.
Rosita,” omong Ruslan ujug-ujug. Tarang
Ros ngariut, kawas teu percaya kana naon nu diucapkeun ku Ruslan bieu. “Ceuk
pangrasa hirup urang duaan teh bakal bagja,” masih cek Ruslan. Ros gogodeg.
Awakna karasa ngegeter. Rek boga turunan kumaha, pan inyana duaan teh
lin salaki-pamajikan?
“Asa pamohalan, Ruslan. Kuring geus boga
salaki, kitu deui pan urangna ge lain salaki pamajikan,” Ros nolak jeung
ngarasa cangcaya. Paromana ngadadak pias.
“Tong lieur atuh, jeung sing rumasa pan urang
duaan teh sok mindeng ngalakukeun nu kitu, ner teu?”
Ros ngahuleng. Naon nu ucapkeun ku Ruslan
memang teu bisa disinglar. Mangpirang waktu rineh geus mere kalonggaran
maranehna pikeun ngalakukeun gawe teu uni. Tapi lin hiji alesan mutlak pikeun
nedunan kahayang Ruslan. Ros teu weleh ngusahakeun sangkan binih ti lalaki ieu
tong nepika ngajadi di rahimna. Manehna teu hayang nipu ka salakina, lamun nepika
kudu ngandung anakna Ruslan. Ros masih
hayang ngajaga kahormatan rumahtanggana nu geus lumangsung dua taun. Paling
henteu ulah kabina-bina teuing, sab ku nu enggeus oge geus kaasup dosa nu
kawilang rongkah.
“Dangetan ieu kawasna kuring kudu cepet mulang.
Aya hadena eta pamadegan teh dipikiran asak-asak. Hampura kuring can bisa
nyaluyuan.” Ros ngajengkat sangeunahna,
dina harti tanpa ucapan asih sakumaha biasa dilakukeun samemehna ari deuk
pisahan.
***
Sapeuting
Ruslan teu mulang ka imahna. Anggur ngagoler hareupeun kafe. Isukna,
isuk-isuk karek mulang dina kaayaan rupa marungkawut. Katangeun indungna
bangkenu awahing geus soak.
“Geus we Ema mah tong make mikir nu
lain-lain.”
“Rek teu mikir kumaha kolot mah salagi ujang
masih keneh masket jeung awewe eta.”
Markon ngahuleng.
“Ros mah da bener, bari jeung bageur
deuih,” omong Ruslan tetep kabengbat.
“Bener?” indungna mencrong, “Bener kumaha
, mun enya ge bener moal daek salingkuh jeung tangtu bakal ngajaga kahormatan
diri katut salakina.”
“Ari tos kudu ka saha deui, sedengkeun
abdi geus kapalang kaceot ka anjeuna,” Markon wangkelang.
Indungna teu nembal. Hatena bati heneg mireng pamadengan anakna nu
kawilang papalingpang tur matak ngerakeun. Tuda rek teu kitu kumaha, sajaba can
boga gawe teh kabehdieunakeun mindeng mabok. Ditambah bet masket jeung awewe batur. Rek teu jadi pikir kumaha, sagala
bangbaluh diweuweuykeun ka sorangan. Da cacak mun aya keneh Darmi –salakina nu
pangsiunan tentara, meureun aya batur
keur pakumaha. Hanjakalna inyana geus ti heula mulang ka kalanggengan.
**
Sapeupeuting hujan taya raatna. Ros guligah
teu bisa sare. Diteuteupna lalaki nu ngagoler gigireunana, bangun tibra.
Isukna Ros ka rumahsakit, bareng jeung
Rukmin, salakina. Inyana deuk nyokot sampel kasehatanana. Geus ampir dua
bulan Ros telat bulan. Nangen kitu
Rukmin jadi surak. Hasil nu dianti-anti salila dua tahun teh kiwari geus
dikobul. Ros ngandeg, rumahtangga tangtu
bakal leuwih bagja. Alhamdulillah, batin Rukmin ngarasa bengras.
Beda jeung Rukmin nu ngarasa bungah, Ros malah sabalikna. Boro ka bisa
surak, nu aya malah hatena asa pasiksak.
Ros ngarasa waswas, ku saha dirina bisa ngandeg, Rukmin salakina atawa
binih ti Ruslan kabogoh salingkuhna?
Kalayan bari susulumputan Ros gowat nelpon Ruslan,
sakabeh kajadian ngeunaan dirina langsung didadarkeun.
“Ari heg rek kumaha deui,” Ruslan kalah sura-seuri.
“Moal anak saha deui, sab salila ieu nu
mindeng sare bareng salian salaki kuring taya deui iwal anjeun.”
“Terus?”
“Kudu digugurkeun.”
“Laku teu hade. Tambah dosa jeung siksa
nu kitu mah.”
“Ari heg kudu kumaha geus kieu?” Ros
sabalikna kalah malik nanya.
“Keun wae si utun mah sina lahir dina
kanyaah rumahtangga anjeun.”
“Enya, tapi kuring teu bisa bohong ka salaki.”
Tut..tut..
***
Hiji awewe tengah tuwuh di rohang tamu
katangen someah ngabageankeun semah. Meusmeus ngalieuk ka hareupeun imah, sugan
nu didago teh mecenghul
bari rek disampakeun
kabungah.
“Jang, engal mulang. Aya nu geulis
nunggu, pasti ujang resep geura.” Indung
Ruslan nyoba ngirimkeun SMS. Nu disebut geulis teh memang bener awewe geulis,
handap asor. Make cidung nu payus, malum anyar kaluar di fakultas agama.
Tapi Ruslan teu paduli kana panggilan
indungna. Bororaah kaceot, nu aya baringung jeung bureng. Masalahna kumaha
sangkan Ros tong nepi ka tega nagugurkeun kandungan tina hasil hubungan jeung
dirina.
Ruslan teu sudi kudu mulang, Malah nepi ka
manggih peuting deui. Bongan sagala kahayangna asa diwatesan, jeung kunaon
sakabeh kabungah asa dibegal? Tengah peuting Ruslan ngojengkang ninggalkeun
kafe.
Manehnya leumpang mapay trotoar.
Tapi teu burung ngarenjag oge dirina basa
di tengah jalan nangen babayi ceurik mani ngear. Babayi saha? Saha nu tega
miceun orok di tempat nu bahaya kieu?
Teu nolih kandaraan nu tingsuliwer, Ruslan
gancang muru ka tengah jalan.
Hujan nu ngadadak turun geus moekan
sagalana. Kaayaan ngadadak bau hanyir, tandaning getih nu pagalo jeung cileuncang
ngalir taya nu mirosea. Sedeng mangpirang kandaraan anger pasuliwer taya
kendatna . (*)
(pangandaran,
november 2015)
Tidak ada komentar:
Posting Komentar